DUMANJUG, CEBU-Sikop sa mga sakop sa tigpatuman sa balaod ang usa ka 18-anyos nga lalaki human kini adunay Warrant of Arrest sa kasong Murder sa Barangay Camboang, lungsod sa Dumanjug sa kasadpang Sugbo niadtong Marso 6, 2025.
Giila ang dinakpan nga si Jimmar Glacio Fajardo, 18-anyos, usa ka construction worker, ug lumulupyo sa Sitio Titip Dako, Barangay Sandayao, Guihulngan City, Negros Oriental nga gitanyag nga usa ka sakop sa Communist Terrorist Group nga sakop sa Sangay Yunit Pampropaganda (SYP) Squad sa CN1 Komiteng Rehiyon-Negros Cebu Bohol Siquijor.
Nasikop kini pinaagi sa pag-serve sa warrant sa mga sakop sa 703rd Maneuver Company sa Regional Mobile Force Battalion – Central Visayas (RMFB-7) nga gipangulohan ni Officer-in-Charge Police Lt Steven Judyll Gella kauban ang Technical Support Unit nga gipangulohan ni Police Maj. Roberto Miguel Orquina.
Pinetsahan ang maong arrest warrant niadtong Enero 16, 2025 sa RTC 7th Judicial Region Branch 102 sa Guihulngan City, Negros Oriental diin nagtanyag sa dinakpan sa iyang pyansa nga P200,000 alang sa iyang temporaryon kagawasan.
Unang gikustodiya sa RMFB-7 ang akusado sa dili pa kini i-turnover sa korte sa Negros Oriental.
