Patay ang duha ka mga minor de edad human nalumos samtang naligo og suba sa Barangay San Miguel lungsod sa Dagohoy, Bohol, pasado alas 4:00 sa hapon, niadtong Huwebes, Hunyo 12, 2025.
Ang mga biktima nga pulos nag-edad og 14-anyos ug nagpuyo sa naasoy nga dapit.
Sa ikslusibong pakighinabi sa Bombo Radyo Cebu kang Jeffrey O. Man-on, fire officer 2, usa sa mga BFP responders sa Dagohoy, Bohol, basi sa ilang nakuha nga impormasyon nga gikan nisalmot ang mga bata sa brigada skwela, ug nidalikyat lamang kini og pangaligo.
Gibutyag usab ni Man-on nga usa sa mga nalumos ang dili kahibalo molangoy, ug gisuwayan kini og luwas sa kauban, hinungdan nga silang duha ang nangaalumos. Atol sa panghitabo, nisuway usab sa pag tabang ang duha ka mga kauban niini, apan, wala na makaya hinungdan nga nanawag kini og laing tabang.
Gipangunahan sa mga sakop sa Municipal Disaster Risk Reduction and Management Office (MDRRM), ug Bureau of Fire Protection (BFP) sa Dagohoy Bohol, ang pag-rescue sa mga bata, apan patay na kini nga nakaplagan sa ilawon sa tubig nga dunay kapin 3 ka dupa ang giladmon ang nahimutangan sa mga bata.
Gisuwayan pa og pagdala sa tambalanan sa maong lungsod ang mga biktima apan, gideklarar na kini nga dead on arrival. | Bombo Irene Ardiente
