CEBU CITY – Patay ang duha ka mga lalaki sulod sa taxi human gipusil sa riding-in-tandem sa Brgy. Dumlog, sa dakbayan sa Talisay.
Giila ang mga biktima nga silang Alvin Morales ug Joel Generalao diin gikan lang sila mipyansa sa korte alang sa giatubang nga kaso sa pagkalambigit sa ilegal nga drugas.
Matud sa imbestigador nga si Police Staff Sergeant Glenn Besande sa Talisay City PNP nga gipara sa 2 ka wala mailhi nga mga lalaki ang taxi nga gisakyan sa mga biktima ug sa mga kauban niini.
Base sa pagsaysay sa driver sa maong taxi nga gipakanaog sa mga gunmen ang mga kauban nilang Morales ug Generalao. Tungod sa kakuyaw sa taxi driver, midagan kini human nga gipusil sa riding-in-tandem ang mga biktima.
Narekober sa kapulisan ang 19 ka mga bala gikan sa crime scene.
Samtang padayon pang giimbestigar sa Talisay City PNP ang motibo sa pagkamatay nilang Morales ug Generalao.
