CEBU CITY- Naangol ang tulo ka mga menor-de-edad atol sa sunog nga miulbo sa Sitio Mahayahay, Barnagay Apas ning dakbayan sa Sugbo niadtong Martes sa gabii, Marso 17, 2026.
Gikumpirmar kini nga taho ni Senior Fire Officer 3 Wendell Villanueva, ang tigpamaba sa Cebu City Fire Office sa eksklusibong pakighinabi niini sa Bombo Radyo Cebu News Team nga matod pa kay ang mga naangol sa mga batan-on kay mga minor injuries ra ang nahiaguman ingon man dali kini nadapatan og hustong tambal ug atensyong medikal.
Sumala pa sa opisyal nga nga subay sa ilang report kay adunay usa ka panimalay ang totally damaged samtang laing usa sab ang partially damaged.
Gipanglantawang nagsugod ang sunog sa panimalay sa usa ka Jocelyn Martinez pag alas 11:45 sa gabii niadtong adlawa.
Sa pagkakaron, kasamtangang gipahimutang sa Barangay Hall sa Apas ang mga apektadong pamilya sa maong katalagman diin gidalitan kini og mga pasiunang tabang gikan sa mga awtoridad.
Padayong pahimangno sa mga awtoridad ilabi na karong buwan sa Marso isip Fire Prevention Month nga kanunay mag-amping ug mahimong alerto sa mga posibleng hinungdan sa hulga sa insidente sa sunog aron dili makalasan sa kinabuhi o sa mga gipanag-iyang mga butang.
