CENTRAL VISAYAS-Patay ang tulo samtang laing tulo ang naangol sa dihang mibangga ang usa ka sakyanan ngadto sa taytayan sa Barangay Buenos Aires, lungsod sa Carmen, Bohol, Lunes sa buntag, Oktubre 23.
Mao kini ang gibutyag ni Police Major Sam Garcia Dacullo, ang hepe sa Carmen Police Station, kinsa miila sa drayber sa nabangga nga sakyanan nga si Jun Re Malisa Cagampang, 39-anyos, nga taga Davao del Sur.
Samtang ang mga namatay giila nga sila si Abelardo Cagampang, Marlon Ondos ug Janice BonBon nga pulos taga Davao del Sur.
Giila ang mga naangol nga sila Lucino Cagampang, Jasper Ardones ug ang drayber nga si Jun Re Cagampang.
Nasayran nga nagpadulong sa lungsod sa Carmen ang mga pasahero aron mobakasyon.
Subay niini, migawas sa inisyal nga imbestigasyon nga nakatulog ang drayber nga si Jun Re Cagampang samtang nagmaneho sa Nissan van hinungdan nga nadasmagan ang sakyanan sa Camanayon Bridge.
Ang mga biktima lakip na ang drayber gidala ngadto kang Cong. Simeon Toribio Memorial Hospital apan
tulo niini gideklarar nga dead on arrival.
Matod usab ni Dacullo nga walay kaso nga ipasaka kalabot sa maong aksidente tungod kay ang mga nalambigit pulos mga paryente.
