Patay ang lima ka tawo human sa usa ka dako nga bangga sa pipila ka mga sakyanan didto sa Virginia, USA.
Sumala sa kapulisan, nahitabo ang aksidente sa Interstate 95 diin usa ka bus nga pampasahero ang nadasmag sa daghang mga sakyanan sa unahan niini.
Tungod sa grabeng impak sa bangga, usa ka sakyanan ang nasunog nga niresulta sa pagkamatay sa upat ka tawo nga natrap sa sulod niini.
Lakip sa mga nakalas sulod sa nasunog nga sakyanan mao ang usa ka 13-anyos nga dalagita ug usa ka 7-anyos nga batang lalaki, nga pulos nagpuyo sa Greenfield, Massachusetts.
Samtang, usa ka 25-anyos nga babaye nga lumad nga taga-Worcester, Massachusetts ang nakabsan usab sa kinabuhi sulod sa iyang SUV.
Samtang duna pa’y laing 44 ka mga tawo ang dinalian nga gidala sa tambalanan tungod sa mga samad ug bali nga naangkon gumikan sa maong aksidente.
Sa pagkakaron, nagpadayon ang mga awtoridad sa pagsusi sa tinuod nga hinungdan sa trahedya ug nag-andam na og tukmang kaso batok sa drayber sa bus, nga giila nga si Jing S. Dong, residente sa Staten Island, New York.
