Gihatagan og mas luwas ug disenteng puy-anan ang mga pamilyang nameligro kaniadto nga mawad-an og puy-anan, kini human pormal nga gitugyan sa Kagamhanan sa Dakbayan sa Naga ang 56 ka low-cost housing units ubos sa ilang programang “Naga Tabang sa Panimalay” niadtong Miyerkules, Agosto 19.
Ang maong mga balay, nga adunay gidak-on nga 20 square meters, adunay usa ka kwarto ug kaugalingong comfort room, gipanghatag nga libre ngadto sa mga kwalipikadong benepisyaryo, diin ang maong turnover gipahigayon uban sa usa ka ceremonial signing sa Deed of Donation sa Vision and Leadership Hall sa City Hall.
Kini nga 56 ka units kabahin lamang sa target nga 160 ka mga balay nga gipundo pinaagi sa allocation sa syudad alang sa 2025 nga nagkantidad og P28 milyon gikan sa ilang General Fund.
Matod ni Mayor Valdemar Chiong, gikan sa orihinal nga banabana nga P160,000 matag yunit, ang presyo sa matag balay misaka ngadto sa P200,000 tungod sa nagkataas nga presyo sa mga materyales sa konstruksyon. Tungod niining pagsaka sa presyo, posible nga maapektuhan ang gidaghanon sa mga bag-ong balay nga tukuron sa umaabot nga mga tuig, diin giandam ang pondo alang sa dugang nga 100 ka yunit karong tuiga. Sa pagkakaron, gawas sa 56 ka yunit nga nahuman na, aduna pa’y 77 ka mga balay nga gitukod.
Gawas sa pagsaka sa presyo sa materyales, gipadayag usab ni Mayor Chiong nga usa sa mga nag-unang hagit sa proyekto mao ang pagpangita og yuta tungod kay kadaghanan sa mga benepisyaryo nagpuyo sa mga property nga dili ilaha. Tungod niini, kinahanglan una nga mokuha ang syudad og consent o Deed of Donation gikan sa mga tag-iya sa yuta sa dili pa masugdan ang pagpanukod.
Dugang pa sa mayor, namugna ang maong proyekto human iyahang namatyagan nga adunay mga pipila sa iyahang mga konstituwente nga bisag adunay balay, mabasa gihapon sa ulan tungod sa buslot nga atop ug adunay kabalaka ugaling basta kusog ang uwan ug hangin.
Samtang, si Engr. Joveno Garcia, ang City Planning and Development Coordinator, mipasabot usab nga ang proyekto usa ka tubag sa panginahanglan alang sa limpyo, luwas, ug himsog nga pabalay batok sa sobra nga kahuot ug sub-standard nga pabalay sa siyudad nga dili makaya sa mga pamilyang ubos ang kita.
Dugang ni Garcia nga ang proyekto nakatabang usab sa lokal nga ekonomiya pinaagi sa paghatag og trabaho sa mga silingang construction worker ug pagpalit og lokal nga mga materyales sama sa balas, graba, ug mga hollow block.
