CEBU CITY-Patay ang 67-anyos nga babaye human giingong natagak gikan sa ika-34 ka andana sa usa ka high-end condominium sa Cardinal Rosales Ave., Brgy. Mabolo ning dakbayan sa Sugbo, niadtong Enero 10, 2025.
Unang nakamatikod nga adunay lagubo gikan sa ibabaw ang usa ka security guard sa maong edipisyo ug nakita nalang ang nabungkag nga ulo ug ang nagkatag nga nagkandaiyang bahin sa lawas niini nga mihalok sa bugnaw nga sawg sa nasangpit nga dalan.
Atol sa pakighinabi sa Bombo Radyo Cebu ngadto kang PMaj. Romeo Caacoy Jr., ang hepe sa Mabolo Police Station diin basi sa ilang nakita sa CCTV footage nga nahulog kini sa taas nga building.
Diin gipanglantawan sa kapulisan ang kalit nga kusog nga paghaguros sa hangin nga posibleng miresulta nga mihapak ngadto sa biktima hangtud nga natagak.
Hinuon, padayon ang pagsusi sa mga sakop sa kapulisan ug pakig-alayon ngadto sa mga nagdumala sa establishamento sa pagtumbok sa tibuok nga panghitabo ug misangpot sa makasubong kamatayon sa babaye hilabi na nga basi sa ilang inisyal nga imbistigasyon kay nag-inusara kini sa maong building.
