CENTRAL VISAYAS- Mihimo ang mga awtoridad sa Police Regional Office 7 (PRO7) og sunod-sunod nga mga operasyon sa pagpatuman sa balaod sa miaging semana, nga miresulta sa pagkasakmit sa shabu nga nagkantidad og PhP12 milyones ug pagkasikop sa 654 ka mga indibidwal nga nalambigit sa nagkalain-laing ilegal nga kalihokan sa tibuok rehiyon.
Nakasakmit usab ang anaa sa 72 ka armas, upat ka eksplosibo, ug 244 ka mga bala, nga miresulta sa pagkasikop sa 47 ka mga indibidwal.
Aduna usab sa 38 ka mga armas ang gi-surrender sa mga awtoridad ubos sa inisyatiba sa Oplan Katok.
Kini subay sa lig-on nga kampanya nga hugot nga nahiuyon sa umaabot nga National ug Local Elections nga gikatakda sa Mayo 2025.
Nasikop usab ang anaa sa 20 ka mga indibidwal nga giila nga high-priority wanted persons, ug laing 171 nga nalakip sa wanted list.
Ang gipakusog nga mga operasyon nga nagpunting sa ilegal nga droga nagbunga ug mahinungdanong resulta, diin ang mga awtoridad nakumpiska sa kinatibuk-ang 1,767.09 gramos sa ilegal nga mga butang nga nagkantidad ug PhP12,016,212.00.
Dugang pa, ang mga operasyon miresulta sa pagkasakmit sa duha ka gramo sa pinaugang dahon sa marijuana ug 700 ka punoan sa marijuana nga nagkantidad ug PhP140,240.00.
Samtang, nasikop sa mga tinugyanan sa balaod ang 202 ka mga drug suspect, lakip ang 15 ka high-value target, 132 ka street-level dealers, ug 55 ka bag-ong giila nga mga suspek nga nalambigit sa drug-related nga mga kalihokan.
Subay niini, si PBGen Redrico Maranan, Regional Director sa PRO7, midayeg sa pasalig ug kakugi sa mga personahe sa pagpatuman sa balaod sa ilang paningkamot aron masiguro ang kaluwasan sa komunidad.
Nasuta nga ang naasoy nga operasyon gihimo sa kapulisan, gikan sa Pebrero 16 hangtod Pebrero 22, 2025.
