Giingong gituyo ang gihimo nga pag-relibo sa mga kapulisan gikan sa protective security nga mga katungdanan sa lain-laing mga personalidad, lakip na ang pipila ka mga opisyal sa gobyerno aron sa pag-rationalize sa ilang deployment sa mga operasyon sa seguridad.
Mao kini ang giluwat nga pamahayag sa Philippine National Police (PNP), nga gihatagan og katin-awan ni PNP chief Gen. Rommel Francisco Marbil human gikumpirmar ni Bise Presidente Sara Duterte ang pagtangtang sa 75 ka mga PNP Police ug Security and Protection Group (PSPG) personnel nga nadestino kaniya.
Matod ni Marbil nga usa ka una nga koordinasyon sa Office of the Vice President (OVP) ang gihimo sa wala pa ang mga opisyal sa kapulisan nga naghatag og proteksyon sa seguridad.
Dugang niya nga ang seguridad sa VP ubos sa Presidential Security Group (PSG) ug ang PSPG nagsuporta lamang sa mga detalye sa seguridad.
Ingon man nga kinahanglan na usab nga makuha ang tanang mga personnel tungod kay ang mga polis wala na’y tulog ug gikapoy na sa pagtrabaho lapas sa ilang oras sa pagtrabaho ug dili na sila makatrabaho ilabi na sa bag-o lang nahuman nga State of the Nation Address duties.
Gani, dili usab ikalimod nga kinahanglan na usab nila og dugang mga opisyal nga idestino sa kadalanan aron mas mapausbaw ang mga lakang sa kalinaw ug kahapsay, ilabi na sa mga kasyudaran.
Ang hepe sa PNP nagkanayon nga ang maong lakang may kalambigitan usab sa iyang kanhing kamandoan nga ipakatap ang labing menos 80 porsiyento sa mga polis.
Ubos sa lagda sa PNP, ang PSPG lang ang gitugotan nga makahatag og protective security personnel niadtong adunay balido nga hulga sa seguridad sa ilang kinabuhi.
