CEBU CITY – Gusto ni Cebu City Mayor Michael Rama nga mahusay na ang 93-1 nga Land Swap deal sa Cebu Provincial Capitol sa Marso 25, 2022, sa dili pa ang campaign period sa mga lokal nga kandidato.
Gitino ni Rama nga magpabilin siyang magmatinud-anon sa saad ni anhing Mayor Edgardo Labella nga ang 93-1 Land Swap deal kinahanglang husayon ug pirmahan sulod sa iyang termino.
Mahuman unta ang land swap deal niadtong 2018 dihang si kanhi Mayor Tomas Osmeña ug kanhi Gobernador karon Bise Gobernador Hilario Davide III, mipirma sa land swap deal.
Hinuon, gihunong sa Commission on Audit (COA) ang deal gumikan wala kini aprobahi sa ahensya.
Apan, daan na nga misaad si anhing Labella ug incumbent Gobernador Gwendolyn Garcia nga mo-draft o mohimo og bag-o ug “mas maayo” nga 93-1 nga land swap deal.
Dugang pa sa mayor nga kinahanglang husayon ang maong deal bisan habig sa dakbayan aron nga inig-presentar na niini ngadto sa Kapitolyo, ma-seal dayon kini.
