CEBU CITY — Wala pay nakit-ang lead ang kapulisan sa suspek sa pagpamanhig-patay sa usa ka negosyanteng Chinese sa Brgy. Cubacub, sa dakbayan sa Mandaue.
Kini subay na sa gipalawom nga imbestigasyon sa kamatayon ni Yi Feng Guo Yang, 51 anyos, kinsang gipusil sa wala mailhing mga gunmen sa miaging adlaw.
Matud ni Police Major Michael Angelo Beltran, ang hepe sa Mandaue Police Station 6, nga ila pang gisubay ug giproseso ang mga nahipos nga CCTV footage sa crime scene.
Dugang pa ni Major Betran nga posibleng ang amahan mismo maoy tuyo sa insidente sa pagpamanhig.
Samtang gitan-aw karon sa mga imbestigador ang tanang mga anggulo sa krimen lakip na ang kalambigitan sa negosyo ug personal grudge.
Anaa na sa luwas nga kahimtang ang duha ka mga anak nga silang Ginabelle Guo Yang ug Stephen Guo Yang apan wala pa sila makatingog sa maong krimen gumikan sa nasinating trauma.
Gipaubos na sa autopsy ang patay’ng lawas ni Yi Feng diin aduna kini samad-pinusilan sa iyang dughan ug ulo.
Samtang gipaubos na sa forensic investigation ang mga nahipos nga ebidensya sa crime scene sama lang sa mga bala, cellphone sa mga biktima, ug crashed helmet.
