CEBU CITY — Gisugdan ang termino sa bag-ong gobernadora sa probinsya sa Sugbo nga si Gwendolyn Garcia pinaagi sa paghandum sa iyang pait nga kasinatian sa nakalabay nga unom ka tuig.
Atol sa iyang inaugural speech kagabii, iyang nahinumduman ang pagpabilin niini sulod sa kapitolyo sulod sa 42 ka adlaw human siya gisuspenso ni kanhi-Presidente Benigno Noynoy Aquino niadtong Disyembre 2012.
Kahinumduman nga gipaubos si Garcia og suspension sulod sa unom ka buwan hangtud nga nahuman kini sa iyang katapusang termino sa pagka-gobernador.
Atubangan sa mga kaalyado ug dili kaalyado, gisaway ni Garcia silang kanhi-Interior Secretary Mar Roxas ug retired Police General Marcelo Garbo, kinsang nagdumala kaniadto sa Police Regional Office-7.
Samtang gisaway usab sa gobernadora si ex-vice governor Agnes Magpale kinsang giingong nagdumala sa iyang pwesto kaniadto isip acting governor.
Plano karon sa bag-ong gobernadora nga palambuon pa ang probinsya pinaagi sa pagsulbad sa trapiko, pagpatuman sa Metro Cebu-wide mass transport system, solid waste management, ug uban pa sa tinguha nga mabalik sa pagka-numero uno ang Sugbo.
