CEBU CITY — Gibana-bana nga mukabat sa 30 ka tonelada ang nakuha nga basura sa Mahiga Creek sa gipahigayun nga river cleanup niadtong Setyembre 14.
Gibutyag ni CENRO (City Ennvironment and Natural Resources) head, Atty John Jigo Dacua, nga mas daghan pa kini itandi sa nakuha nila nga basura sa Guadalupe river kung diin nakuha nila ang mga plastic, panapton, ingun man mga sako nga nalubung na sa yuta.
Matud pa nga mas ‘challenging’ ang maong river cleanup gumikan kay mas lawum ang Mahiga Creek itandi sa Guadalupe river ug nagkuwang sila ug mga floaters.
Giangkun usab ni Atty Dacua nga nasagmuyu kini sa mga residente nga anaa nagpuyu sa palibut sa Mahiga Creek gumikan kay wala’y bisan usa ang mitabang kanila ug gani giingung nakaangkun pa sila ug mga pagsaway.
Hinu-un, gitataw ni Dacua nga dili kini makaapekto sa ilahang pagpanglimpyu ug magpadayun ang tinguha ni Cebu City Mayor Edgardo Labella nga ma-rehabilitate ang mga kasapaan. (SBR)
