CEBU CITY — Nahadlok ang mga Overseas Filipino Workers (OFWs) sa nasud nga Hongkong subay sa nagpadayon ug migrabe pa nga lihok protesta.
Sa ekslusibo nga pakighinabi sa Bombo Radyo Cebu sa usa ka OFW nga si Amelia Mendez, giingon niini nga makahahadlok na ang mga nahitabong gubot sa naasoy nga nasud tungod kay gipangsunog sa mga raliyesta ang mga tindahan, ug gipangbuak pa.
Tungod niini, lisod na usab para kanila ang pagawas-gawas ug bisan day off si Mendez dili nalang siya mugawas tungod kay wala naman kini masakyan kay dili na mu-function ang mga tren ug gipangdauban usab ang mga subway stations.
Hasta usab matud pa ang pagpangopra sa merkado, lisod, sanglit wala na matud pa’y mapalit nga preskong baligya.
Sa karon, doble ang pag-amping nga ilang gibuhat ug kung duna matud pa’y abiso gikan sa Consulate nga pau-lion sila sa Pilipinas,dili sila magduha-duha basta lang matud pa makuha ni Mendez ang iyang long service pay tungod kay wala nay kasiguru-an nga makabalik pa siya.
Mensahe nalang ni Mendez sa sama niyang OFW nga mag-amping kanunay ug nangayo kini og pag-ampo sa nga Pilipino sa Pilipinas para sa ilang kaluwasan. (with reports by Bombo Crisle Adlawan/FDP)
