CEBU CITY-Patay ang upat sa siyam ka mga suspek nga mitulis sa duha ka jewelry store, usa ka pawnshop ug usa ka money changer sulod sa J Center Mall sa Barangay Bakilid, dakbayan sa Mandaue.
Giila ang mga napatay nga sila si Kevin Plaza Andales, 25 anyos, Wilfredo Swerte Inggito, 47 anyos, pulos mga taga Tangub City, Misamis Occidental, Philip Faborada, hingkud ang panuigon, taga Tondo, Manila, ug si Daisy Glenn Tairos, 47 anyos, nga taga Barangay Lawaan, dakbayan sa Talisay, kinsang gitudlo usab nga lider sa grupo.
Sa eksklusibo nga pakighinabi sa Bombo Radyo Cebu kang Police Lt. Col. Emily Santos, ang hepe sa Bogo PNP, gibutyag niini nga ang upat ka mga napatay ang lakip sa siyam ka mga suspek nga ilahang na-intercept sa Pulangbato Wharf sa dakbayan sa Sugbo kagabii.
Gisaysay ni Lt. Col. Santos nga samtang gisakay nila ang siyam ka mga suspek paingun unta sa police station, giingung nangilog kini ug armas hinungdan sa nahitabung komosyon ug napatay ang nahisgutang upat sa siyam ka mga tulisan.
Gawas sa upat ka mga napatay, sikup usab sila si James Anthony Gomez, 44 anyos, taga Osamiz City, Misamis Occidental, Jolyvyn Quirante, 43 anyos, taga Tangub City, Filomeno Candelaria, Jr. 38 anyos, taga Naga City, Bicol, ug si Arnel Cimafranca, 38 anyos, kinsang giingung samdan usab sa kamot.
Matud pa sa hepe nga paingun unta ang mga tulisan sa Masbate apan nakadawat sila ug report gikan sa mga pasahero sa barko nga gisakyan sa mga suspek. Giingung nagduda ang mga pasahero gumikan kay adunay mga nagkadusingot sa mga suspek, ingun man ang nagkadugo nga si Cimafranca hinungdan nga gi-report kini nila ngadto sa mga pulis nga naka-assign sa Pulangbato Wharf.
Nakuha sa mga operatiba gikan sa mga dinakpan ang P345,000 ‘in 1,000 cash denomination’.Gipasusi usab ni Lt. Col. Santos ang tanang mga pawnshop, jewelry shop sa iyahang area of jurisdiction gumikan sa posibilidad nga gi-prenda ang mga alahas nga nakuha sa mga suspek.
Nasayran nga kauban sa Bogo PNP sa operasyon ang Mandaue PNP ug ang Regional Special Operations Group (RSOG 7). (SBR)
