CEBU CITY — Gipahibalo sa Land Transporation Franchising and Regulatory Board (LTFRB)-7 nga magpadayon ang transaksyon bisan pa man og nasunog ang ilang buhatan sa miaging kaadlawon.
Matud ni LTFRB-7 Director Eduardo Montealto nga temporaryo silang mopahiluna sa Robinsons Galleria mall, dakbayan sa Sugbo human gibalhin ang ilang mga gamit gikan sa nasunog nga opisina.
Dali miuli ang director gikan sa Bicol human madawat ang balita nga nasunog ang maong buhatan niadtong Oktubre 27 sa kaadlawon.
Gibutyag ni Montealto nga lakip sa naugdaw mao ang ubay-ubay nga mga importanteng mga dokumento lakip na ang pipila ka mga computers aduna pay mga nahabilin.
Kini gumikan kay karaan ang maong building ug posibleng gipangkitkit sa mga ilaga ang wiring sa kuryente.
Dugang pa ni Montealto nga mubalik sila sa maong building gumikan kay mas dako-dako kini ug adunay kaparkingan sa sakyanan itandi sa ilang temporary office.
Mihangyo usab si Montealto sa katawhan nga kung ugaling adunay mangayo ug mga hinabang o solicitation sa nahitabong sunog, isumbong kini dayon sa buhatan aron maaksyunan.
