CEBU CITY — Mipadayag ang Office of the Senior Citizen Affairs (OSCA) sa Cebu City Government nga dili malikayan nga mawagtang sa ilang record ang pipila ka mga senior citizens gumikan kay dili magkapareho ang detalye sa ID sa ilang payroll ug OSCA ID.
Matud ni OSCA Head Dominggo Chavez nga dili malikayang masipyat og type ang ID number sa mga senior citizen hinungdan nga dili gyud daling makapagawas ang pondo alang kanila.
Dugang pa niini nga angayang manginlabot ang disbursing officer kung makadawat ang uban pang mga senior citizen og cash assistance bisan pa man og wala sila sa listahan sa OSCA.
Nasayran nga mireklamo ang pipila ka mga senior citizens nga beneficiaries sa maong assistance diin nakuha sa lain ang ilang hinabang ug lain usab ang mipirma sa ilang pangalan.
Sa laing bahin, miduso og ordinansa si Cebu City Councilor Jun Gabuya kabahin sa mga Senior Citizen diin dili mawala sa listahan ang ilang mga pangalan kung dili makakobra sa ika-3 nga higayon.
Kini human nga nakita ni Gabuya nga adunay mga higayon nga dili maka-kobra ang mga senior citizen gumikan sa mga kakulian.
Matud sa konsehal nga pinaagi niini, dili na kinahanglang mo-apply og balik ang mga senior citizen kung dili makakobra tungod sa kahasol sa proseso.
Giduso usab ni Gabuya nga kung di makadawat sa financial assistance, kinahanglan nga ipa-post sa mga publiko nga lugar para mahatagan ug pagtagad. (with reports by Bombo Jun Salde/gn/lq)
