CEBU CITY – Pasakaan ug kaso karung adlawa ang duha ka mga nadakpan nga suspek sa pagpusil patay sa radio blocktimer nga si Dindo Generoso sa Dumaguete City.
Sa pakighinabi sa Bombo Radyo Cebu kang Negros Oriental Provincial Police Office Director, Police Colonel Julian Entoma nga ilahang nasikop kagabii ang kanhi SAF member nga si Police Corporal Glenn Corsame ug ang spotter nga si Teddy Silao, duol sa mga gipuy-an sa duha sa nahisgutang syudad.
Matud ni Police Colonel Entoma nga ilahang na-identify si Corsame ug Silao pinaagi sa kuha sa mga CCTV camera sa area kung diin gipusil ang magsisibya.
Nakuhaan pa sa mga otoridad ug usa ka kalibre .45 nga pistola si Silao kung diin aduna pa’y paglugnot sa dihang gidakop, samtang malinawon lang nga mikuyog sa kapulisan si Corsame.
Nasayran nga buwan sa Enero niining kasamtangan nga tuig lang nag-optional retirement si Corsame ug recruit kini sa Special Action Force o SAF.
Ang biktima usab nga si Generoso ang giila nga usa ka ‘hardhitting commentator’ kung diin paga-tirahan niini sa kahanginan ang mga pulis ug politiko.
Sa pagkakarun, padayon ang hot-pursuit operation sa kapulisan alang sa pagsikop sa uban pang mga suspek sa nahisgutang krimen.
