CEBU CITY — Gihimug-atan ni Cebu City Councilor Reymond Garcia nga dili mahitabong magbungkag ang Labella-Rama tandem gumikan kay maayu ang relasyon sa duha.
Matod sa konsehal sa North District nga mag-uban gihapon ang Labella-Rama hangtod sa sunod election sa tuig 2022 taliwa sa mga spekulasyon.
Apan wala giwagtang ni Garcia ang maong posibilidad gumikan kay mao man gayud ang dagan sa politika kung diin ang kauban mamahimo nga kontra ug ang kontra mamahimo nga kauban.
Dugang pa sa konsehal nga aduna silay weekly meeting sa ilang partido alang sa paghisgot sa ilang mga plano ug para di usab mabuwag ang ilang grupo.
Nakita usab, matud pa, sa katawhan nga lig-on ang tandem nga Labella-Rama hinungdan gibuhat-buhatan na kini ug storya bisan sa kalayo sa panahon sa eleksyon.
Gibutyag usab ni Garcia nga dako kini og bilib sa Vice mayor kung diin aduna nay daghan nga gi-sakripisyo aron di maguba ang ilang grupo.
Samtang sa laing bahin gibutyag ni Garcia kabahin sa nikatap nga mga hulagway ni Rama sa social media nga nagsuyop ug shabu nga posible ang mga kaatbang ra usab ang nagbuhat niini. (Lahvi Quiñones)
