CEBU CITY — Naluya ang head sa Cebu City Prevention, Restoration, Beautiful, and Enhancement (PROBE) nga si Raquel Arce human makadawat og mga personal nga pagpang-atake batok kaniya.
Kini human nga nag-viral sa social media ang post sa usa ka manindahay ug prutas nga naninda sa Brgy. Mabolo kinsa nga gituohang gimaltratar sa mga sakop sa PROBE.
Matud ni Arce, ika-pila na kini ka higayon nga gibuyag ang maong ambulant vendor apan wala gyud kini mopatuo.
Gitugyan na lang ni Arce sa city legal office ang imbestigasyon sa nahitabo aron, matod pa, di mahulog nga biased ang pagpahigayon niini.
Nangayo usab ug despensa ang maong PROBE head ngadto sa katawhan kabahin sa maong panghitabo gumikan kay, matud pa, law-ay tan-awn ang maong video.
Apan gihimug-atan usab niini nga dili makasabot ang publiko kabahin sa nahitabo tungod kay wala sila nakasaksi kung giunsa pagbalik-balik og badlong ang maong vendor.
Sa pagkakaron, grounded ang 4 ka mga operatiba nga nakita sa video human sa maong hitabo ug kasamtangan usa kini silang gibutang sa clean up drive.
‘Mixed emotions’
Sagul nga emosyon ang gibati ni Cebu City Councilor Alvin Dizon human nakita nga mikatap ang video sa side walk vendor ug sa sakop sa Cebu City PROBE nga nag-inilogay sa mga tinda niini.
Kini gumikan kay, matud pa, naningkamot ang tindero aron mabuhi ang ilang pamilya apan mao lang kini ang nahitabo.
Gihimug-atan ni Dizon nga ang mga vendors dili kini sila problema apan mga tao kini sila nga nanginahanglan ug tabang sa gobyerno.
Samtang nalooy si Cebu City Vice Mayor Michael Rama sa vendors human nakita ang video nga giilogan sa mga sakop sa PROBE sa mga tinda niini nga prutas.
Matod ni Rama kinahanglan mobarog si Cebu City Mayor Edgardo Labella kabahin niini. Kini aron masuta kun pabalikon ba o dili ang mga sidewalk vendors.
Dugang sa bise mayor, nga kung siya pa ang mayor sa dakbayan, iyang storyahon ang presidente kabahin sa sitwasyon sa mga apektado.
Gibutyag usab niini nga kung mahimo, mohimo kini og alternatibo nga programa para sa mga apektado. (Lahvi Quiñones)
