CEBU CITY – Gidugok sa libu-an ka mga deboto ni Sr. Sto. Niño sa gipahigayon nga fluvial procession kaganihang buntag sa bisperas sa Fiesta Señor 2020.
Bantay sarado sa Philippine Coast Guard, Philippine Navy, ug maritime police ang MV Teofilo Camomot nga gihimong galleon karung tuiga.
Milawig ang nahisgutang galleon nga sakay ang imahe ni Sr. Sto. Niño gikan sa dakbayan sa Mandaue paingon sa Pier 1 dinhi sa dakbayan sa Sugbo.
Lakip usab sa fluvial procession ang 160 ka mga shipping vessel kung diin matag usa ang adunay sakay ka mga deboto ug ang uban aduna pa’y tribal band.
Pagdunggo usab sa galleon sa Pier 1, gisugat kini sa gatusan ka mga pulis ug adunay mga Sinulog dancers usab nga naghalad ug sayaw alang kang Sr. Sto. Niño.
Dali usab kini nga gidala pagbalik sa Basilica Minore del Sto. Niño ug didto gipahigayon ang re-enactment sa unang misa, baptismo ug kasal.
Samtang, nagpatuman usab ug cellphone signal shutoff samtang gipahigayon ang fluvial procession ug gilauman nga pagabuhaton kini sa uban pang importante nga aktibidad sa Sinulog 2020 ilabi na sa pag-abot ni Presidente Rodrigo Duterte dinhi sa dakbayan sa Sugbo ugmang adlawa.
