Giimbestigaran sa Police Regional Office (PRO)-7 ang gituohang pagpangilkil sa usa ka kanhi pulis ngadto sa mga aplikante sa pagkapulis.
Kini human nga nasikop sa usa ka entrapment operation sa dakbayan sa Lapu-Lapu sa nakalabay nga adlaw ang dinakpan nga si Police Corporal Carlito Donque.
Matud ni Police Brigadier General Domingo Cabilan, ang deputy director for administration, nga nasikop si Donque sa maong operasyon sa usa ka pawnshop niadtong Enero 23 sa Brgy. Bangkal, Lapu-Lapu City human makuha niini ang extortion money nga P10,000 gikan sa usa ka aplikante.
Base sa ilang imbestigasyon, nangayo ang dinakpan og P40,000 gikan sa aplikante aron lang makasulod sa pagka-pulis.
Dugang pa ni Cabilan nga atol sa entrapment, mihangyo ang biktima nga mobayad una og P10,000 ngadto ni Donque ug pun-an ang maong bayad kung masiguro na ang recruitment process.
Base sa ilang nahuptang police records, na-assign sa PNP-Aviation Security Unit si Donque ug na-dismiss kini sa serbisyo niadtong Oktubre 2018 human nga nag-absent-without-leave.
Gikustodiya na karon sa PRO-7 ang kanhi-pulis samtang nagpadayon pa ang imbestigasyon.
Mipahimangno ang PRO-7 nga gidili gayud ang pagpangilkil ngadto sa mga police applicant aron dili silotan og expulsion sa serbisyo.
