CEBU CITY – Mipahimangno si Cebu City Police Office Director Police Colonel Engelbert Soriano ngadto sa mga kalalakin-an nga gustong mangabang ug babaye.
Gipasabot ni Police Colonel Soriano nga ang prostitusyon usa ka criminal act diin mahimo gayud nga mapasakaan ug kaso.
Apan giangkon niini nga mao kini ang klase sa iligal nga aktibidad nga maglisod gayud ang kapulisan ug pag-monitor.
Matud sa police director nga likayan ang susama nga transaksyon gumikan kay delikado niini ang personal security, ingon man nga delikado usab nga matakboyan ug sakit sama na lang sa Human Immunodeficiency Virus (HIV) diin taas ang ihap dinhi sa Sugbo.
Ang maong pamahayag ni Soriano human sa nahitabong komosyon sa usa ka lodge sa dalan Manalili niining dakbayan sa dihang gibugno sa usa ka sex worker ang iyahang customer human nga nagdumili kini pagbayad ug ‘additional tip’ nga P1000.
