CEBU CITY – Gideklarar na sa United States of America ang ‘status of heightened emergency’ kalabot na usab sa 2019 novel coronavirus outbreak.
Sa pakighinabi sa Bombo Radyo Cebu kang Rufino Pinoy Gonzales, Bombo US Correspondent, gibutyag niini nga gihunong na ang pagsulod sa mga eroplano sa China ug wala na’y mga eroplano sa America ang gitugutan nga makabyahe paingon sa China.
Matud ni Gonzales nga adunay travel ban ang US kung diin wala na gitugutan nga makasulod ang mga Chinese nationals.
Gani, giingong adunay pamilya nga Chinese nga mibyahe paingon sa America apan wala na kini pasudla gumikan sa N-CoV scare.
Sigon pa nga makaluluoy usab ang mga Chinese nga gusto lang maka-survive gikan sa makamatay nga virus apan wala na’y nasud nga mudawat kanila.
Gawas sa ‘scanning’, nagpahigayon usab ug ‘swab testing’ sa airport una hingpit nga makasulod sa nasud.
Samtang, ang mga airlines adunay gipahigayon nga “Fly now, pay later” scheme, gumikan kay giingong wala na’y gusto nga mubyahe ug gani lakip ang mga flight attendant ug uban pang mga crew ang dili na una gusto nga mutrabaho gumikan sa kahadlok nga mataptan ug novel coronavirus.
