CEBU CITY — Giimbestigaran sa mga sakop sa kapulisan ang pagpamusil-patay sa usa ka Indian-national kagahapon sa Brgy. San Vicente, lungsod sa Liloan, Cebu.
Giila ang biktima nga si Jagdish Singh, 25-anyos, usa ka negosyante, ug nagpuyo sa Brgy. Poblacion Oriental, Consolacion.
Matud sa desk officer sa Liloan PNP nga si Police Master Sergeant Jason Gayo nga nagkuyog ang biktima ug ang ig-agaw niini sakay sa ilang motor.
Sa dihang nangita og pansayan ang ig-agaw sa Indian national aron mangihi, kalit lang nga miabot ang wala mailhing lalaki nga naka-helmet diin misakay kini sa iyang motor.
Gipusil sa gunman ang maong biktima kalima na ka higayon dayon og sibat palayo sa nahitaboan.
Patay na diha dayon ang biktima human nakaangkon og samad-pinusilan sa iyang lawas.
Narekober sa kapulisan ang lima ka kabhang sa kalibre 45 nga armas gikan sa crime scene.
Nagpabiling blangko ang otoridad kung unsa man ang motibo sa maong krimen sa Liloan.
