Gikondinar sa mga opisyal sa lungsod sa Ginatilan ang pagpusil patay kang municipal councilor Maria Liza Toledo.
Sa eksklusibo nga pakighinabi sa Bombo Radyo kang Ginatilan Vice Mayor Jose Ramon Gornez, giingong dako ug impact ang nahitabong krimen alang sa katawhan sa ilahang lungsod diin makamugna kini ug kahadlok, ingon man nga makadaut kini sa imahe sa lugar.
Subay niini, nanghinaut ang bise mayor nga mapaspasan sa kapulisan ang pagsulbad sa maong krimen ug madakpan na ang mga mamumuno arun usab nga mahatagan ug hustisya ang kamatayon ni Konsehal Toledo.
Una niini, gisaysay ni Gornez nga gikan sila nga nagpahigayon ug session sa wala pa mahitabo ang krimen.
Sigon pa nga si Toledo ang mibangka kanila ug pani-udto diin iyaha pa kining naka-istorya.
Giingong namahayag ang konsehal nga mag-una na lang ang ilahang pagsaulog sa kapiyestahan sa lungsod gumikan kay ma-busy na unya silang mga opisyal.
Gibutyag sa bise mayor nga mi-una ug pa-uli ang konsehal apan pagkalabay sa dili mu ubos ug 5 minutos sukad kini nga mikanaug gikan sa session hall, kalit nga milanog ang usa ka boto sa armas.
Gani, giingong siya mismo ang nakadungog usab sa boto sa armas ug didto nagkaguliyang na ang mga empleyado sa munisipyo human nga nahagba ang konsehal sa atubangan sa ilahang town hall.
Nadala pa sa tambalanan ang biktima apan pasado alas 2 kagahapon sa hapon, nakabsan na sa kinabuhi ang opisyal.
Nagkanayon si Gornez nga wala kini kasayoran kung aduna ba’y hulga sa kinabuhi si Toledo gumikan kay giingong wala may gi-istorya ang konsehal kanila kalabot niini. (sbr)
