Gipaubos na ang dakbayan sa Sugbo sa general community quarantine aron kalikayan ang posibleng pagkatap sa makamatay nga coronavirus disease o COVID-19.
Kini human nga napirmahan ni Mayor Edgardo Labella ang Executive Order No. 52 diin ipatuman kini sulod sa 30 ka adlaw.
Gipasabot ni Labella nga tuyong gipaubos ang dakbayan sa maong deklarasyon aron dili na maglaag ang katawhan ug magpuyo na lang sa tagsa-tagsa ka mga panimalay.
Tungod niini, ipatuman sa dakbayan ang mga health checkpoints sa matag entry points sa dakbayan.
Kinahanglan lang nga ipakita ang ilang company ID o bisan unsang “proof of itinerary” alang sa mga mo-duty o adunay importanteng lakaw.
Gipatuman na sa dakbayan ang curfew matag alas-8 sa gabii hangtud na sa alas-5 sa buntag.
Limitado usab ang operasyon sa mga commercial establishments hangtud na sa alas-8 sa gabii.
Samtang ipahigayon usab ang house-to-house monitoring aron subayon kahimtang sa panglawas sa mga residente.
Nagkanayon si Labella nga tuyong gihimo ang maong lakang aron dili na mokaylap ang virus, ilabi na nga wala pay confirmed cases sa COVID-19 sa Cebu City
