CEBU CITY — Magsugod na ang pagpanghatag sa enhanced community quarantine cards ngadto sa mga konstitwente sa dakbayan sa Sugbo sugod karong adlawa, nunot na sa gipatumang enhanced community quarantine.
Matud ni Councilor Raymond Alvin Garcia nga ang City Government mismo maoy mo-isyu sa maong quarantine pass ug invalid na ang unang gipanghatag sa mga barangay.
Ipang-distribute ang green nga quarantine pass ngadto sa mga barangay sulod lang sa lima ka adlaw.
Ihatud mismo sa mga kawani sa barangay o ang kapulisan ang maong pass ngadto sa tagsa-tagsa ka mga panimalay ug dili na magkinahanglan og voter’s ID.
Dugang pa ni Garcia nga kinahanglang mopadangat og formal request ngadto sa City Government ang kinsang makabaton quarantine pass alang sa mga government workers, mga non-residents, ug sa crisis management team.
Samtang dili na magkinahanglan og mga quarantine pass ang pipila ka mga indibidwal sama lang sa medical practitioners, emergency personnels, mga sakop sa media, trabahante sa mga supermarkets, ug uban pa basta ipakita lang ang ilang company ID o bisan unsang dokumento ngadto sa checkpoints.
Magsugod ang enhanced community quarantine pinaagi sa usa ka bagting, inubanan usab sa silbato sa mga barko.
Molanat ang pagpatuman sa enhanced community quarantine sa dakbayan sa Sugbo hangtud sa Abril 28.
