CEBU CITY– Gipahibalo ni Majority Leader Cebu City Councilor Raymund Garcia atol sa Bombo Barangay nga karong semana sugdan na sa pagpanghatag sa Department of Social Welfare and Development (DSWD) ang form alang sa Social Amelioration Program (SAP).
Kini human usab nga nakigtagbo si Cebu City Mayor Edgardo Labella sa mga kapitan kauban ang kadagkuan sa DSWD aron sa implementation sa SAP.
Gitataw usab ni Garcia nga, gi-meetingan na sa DSWD ug ingon man sa Department of Labor and Employment (DOLE) ug ‘Department of Social Welfare and Services (DSWS) kung si kinsa ang mamahimong ‘eligible’ niining maong assistance ug human matud pa nga mahatag ang Social Amelioration Card (SAC) form, sugdan na nila ang validation karong semanaha.
Ang pagpanghatag sa form ang ipaagi sa Gender And Development (GAD) officers ug sa Barangay Health Worker (BHW) sa barangay hinungdan nga mipahimangno si Garcia nga dili i-replicate ang mga SAC form sanglit duna kini barcode.
Ug kung ugaling duna matud pay mamaligya niini, mando sa konsehal na dili kini magpatonto.
Gipasabot usab sa konsehal nga kinahanglan nga duna gyuy profiling nga pagahimoon ang DSWD ug ang barangay sanglit kinahanglan ang ‘constant updating’ kung si kinsa na ang mga namuyo sa barangay ug kung kini sila ang angayan nga mahatagan sa naasoy nga ayuda.
