CEBU CITY — Niabot na sa 203 ang ihap sa mga nagpositibo sa coronavirus disease o COVID-19 sa Central Visayas human nga nadugangan og laing 12 ka mga nagpositibo sa maong sakit.
Sa latest record gikan sa Department of Health (DOH)-7, nagagikan ang pito ka mga bag-ong kaso sa dakbayan sa Sugbo, duha sa Lapu-Lapu, ug tulo sa dakbayan sa Mandaue.
Lakip sa mga nataptan sa COVID-19 mao ang usa ka bag-ong nahimugso nga bata gikan sa dakbayan sa Sugbo ug gisubay karon sa DOH-7 kung natakbuyan kini bisan og negatibo sa virus ang inahan niini.
Sa kasamtangan, anaa sa 173 ang confirmed cases sa COVID-19 sa Cebu City, 13 sa Lapu-Lapu, ug siyam sa Mandaue City.
Samtang wala gihapoy dugang nga kaso sa lalawigan sa Sugbo, Negros Oriental, Bohol, ug Siquijor.
Sa laing bahin, nagnegatibo sa maong sakit ang usa ka pasyente gikan sa dakbayan sa Sugbo.
Anaa karon sa 24 ang nagnegatibo ug nangaayo sa COVID-19 samtang nagpabilin sa siyam ang namatay.
Nikunhod ang fatality rate sa COVID-19 sa sulod sa rehiyon gikan sa 4.7 percent ngadto na sa 4.4 percent diin mas ubos kini sa global average nga 6.4 percent.
Gipasabot ni DOH-7 Director Dr. Jaime Bernadas nga delikado kaayo alang sa buntis ang mataptan sa COVID-19 tungod kay nagkinahanglan kini og taas nga demand sa nutrisyon.
Mipahinumdom kini sa katawhan nga mas maayong mosunod gayud sa mga health protocols sama lang sa makanunayon nga panghunaw sa kamot, social distancing, ug pagbaton og dugang pang sustansya sa lawas.
