CEBU CITY-Gikakugang sa mga residente sa Barangay Casili sa dakbayan sa Mandaue ang nagtipun-og nga mga patay’ng baboy nga sulod sa usa ka sakyanan nga naghunong sa ilang dapit.
Mismong si Mandaue City Mayor Jonas Cortes ang nakakita sa mga naasoy nga baboy hinungdan nga gipatawag niini ang Mandaue City Veterinarian Karen Mirelles, aron nga masusi ang naasoy nga mga baboy.
Nasayran nga boot unta matud pa kining ibaligya apan nasanta sa mayor.
Nasuta nga 8 ka baboy ang namatay diin nalakip kini sa 130 ka mga baboy nga gibiyahe gikan sa Negros Oriental ug padung unta sa Barangy Jagobiao ug posibleng nga na heat stroke kini sa biyahe hinungdan nga namatay.
Mutimbang sa 20 ngadto sa 30 kilos ang naasoy nga mga baboy nga nagkantidad og 4 ngadto na sa 5 mil matag usa.
Aron usab nga dili madispose sa publiko ang naasoy nga baboy dali kini nga gipalubong ni Mayor Cortes. Mipasalig usab kini sa katawhan sa Barangay Casili nga walay angayang ikabalaka ang mga nagbuhi og baboy sa maong dapit. | reports from Bombo Crislie Adlawan
