CEBU CITY-Nagsukod-sukod apan sa gihapon wala matud pa’y kongkreto nga aksyon nga gibuhat ang lokal nga kagamhanan sa dakbayan sa Talisay. Kini subay sa reklamo nga gipadangat sa mga residente sa Sitio Sugarland, Barangay San Roque sa naasoy nga dakbayan sa Bombo Radyo Cebu diin nag-antos sila sa tubig baha sa ilang dapit nga wala nay hubas-hubas.
Gibutyag ni Fiel Bacayo, residente sa maong dapit nga mibisita sa ilahang barangay ang mga sakop sa City Engineering’s Office ug giingong nagsukod-sukod sa area.
Sa nasayran niini, matud pa nga butangan ug ‘automatic water pump’ ang dapit nga nagbaha, apan giingong dili kini ang ilahang gikinahanglan. Sigon pa nga ‘drainage’ ang ilahang gikinahanglan arun nga mahubas na ang tubig baha sa ilahang lugar.
Gihulagway ni Bacayo nga hilabihan na ka baho ang tubig, ug lain na ug kolor, diin giingong nasagol na niini ang mga duga nga gikan sa nanga-awas nga septic tank.
Subay niini, padayon nga nanawagan si Bacayo kang Talisay City Mayor Gerald Anthony Gullas, nga tabangan sila sa ilahang sitwasyon diin giingong dili na normal ang ilahang pagpuyo. Nagkanayon si Bacayo nga karun na ang panahon nga angayang dunggon ang ilahang mga yangu-ngo.
‘Gipang-nuka’
Gipadayag ni Cris Termoloc, usa sa mga residente, nga daghan nang dagko nga nuka sa iyahang bati-is paingon sa paa niini diin nanghapdos ug nagngulngol na kini. Matud pa nga nabalaka kini nga matakbuyan sa sakit nga ‘leptospirosis’ gumikan sa hugaw nga tubig.
Giingong mugrabe pa gayud ang iyahang mga nuka kung dili pa mahubas ang baha sa ilahang dapit nga gituohang nagdala na ug daghang kagaw.
Samtang, gihulagway usab ni Hannah Reyes nga “useless” o walay gamit ang giingong plano nga paghimo ug “lagoon” isip sulbad sa ilahang problema. Sigon pa nga kung usa ka lagoon ang himu-on, sa gihapon magpundok ug mo awas ang tubig kung kanunay ang pag-uwan.
Gipadayag niini nga hilabihan na ang ilahang konsomisyon sa maong problema ug giingong mudugang pa ang ilahang kabalaka alang sa mga bata nga matakbuyan na hinuon ug sakit.
Gihimug-atan usab ni Reyes nga ‘drainage’ ang ilahang gikinahanglan ug dili ‘lagoon’ arun nga ‘flowing’ na ang tubig kung ugaling mubunok ang kusog nga uwan. |SBR
