CEBU CITY — Tun-an pa sa Land Transportation, Franchising, and Regulatory Board (LTFRB-7) ang hangyo ni Cebu City Councilor James Cuenco alang sa subling pagbiyahe sa mga traditional jeepney sa syudad sa Sugbo.
Kini ang nahimung pamahayag ni LTFRB-7 Regional Directo Eduardo Montealto sa dihang nahinabi sa Bombo Radyo Cebu.
Matud pa niini nga ilang dawaton ang request sa konsehal ug sa lokal nga kagamhanan sa syudad.
Hangyo pa Montealto kang Cuenco nga ilang ipadala sa daling panahon ang suwat arun taas-taas ang oras nga ila kining matun-an, ma-justify ug posibleng makabiyahe ang mga traditional jeepney sa buwan sa oktubre.
Posible usab nga hulipan sa mga traditional jeepney ang mga dagkung bus nga kasamtangan nagbiyahe karon sa syudad sa Mandaue ug sa Sugbo ilabi na kung ibalik na ang mga cross-border travel sama nalang sa Cebu-Dumaguete o Cebu-Bohol.
Arun tugutan makabiyahe, kinahanglan kumpletohon usab sa mga operators o drivers sa traditional jeepney ang mga resikitos sama nalang sa Roadworthiness, Life insurance, registration, plastice barrier ug uban pa.
Alang usab sa pagpatuman sa protokol, kinahanglan isulod sa mga pasahero ang ilang plete sa usa ka box o sudlanan sa duol sa driver sa dili pa mosakay o ig kanaug sa sakyanan arun malikayan ang pagtunol-tunol sa plete.
Samtang, gihimug-atan ni Montealto nga dili pa kini makasulti nga nagkulang ang public transport sa syudad.
Pagtataw pa niini nga matag Peak hour lang magkuwang ang mga public transport tungod daghan ang pasahero nga nag-atang nga makasakay. /EKP
