CEBU CITY — Gikumpirmar sa tigpamaba sa Guiholngan City, Negros Oriental Schools Division Romel Victor Villahermosa nga adunay naka-abot sa ila nga impormasyon gikan sa otoridad kalabot sa alleged nga nahitabong pagpakamatay matod pa sa usa ka menor-de-edad nga estudyante sa Brgy. Mani-ak dakbayan sa Guiholngan Negros Oriental.
Segon kang Villahermosa nga gipanubayan usab sa Department of Education sa Negros ang maong insidente.
Sa habig sa pamunuan sa tunghaan kung asa nag-eskwela ang biktima, gihulagway niini ang maong menor-de-edad nga average student, gani maingon wa’y problema ang pag-answer niini sa iyang learning modules gumikan kay na-kompleto niini ang week 1.
Sa impormasyon nga nadawat sa habig sa School Division, wa matod pa’y nakabantay sa biktima sanglit nilakw ang inahan niini sa tunghaan sa maguwang sa menor-de-edad aron magkuha sa learning modules; samtang ang maguwang usab sa biktima ni-adto sa tunghaan aron ipasa niin mismo ang na-tubag na nga modules ug aron kuhaon ang alang sa week 2.
Sa wa pa matod pa nilakaw ang maguwang niini, nibutyag kini nga matubag niya ang learning modules sa week 2 kung maabtan pa kini sa maguwang nga buhi.
Gibalewala lang matod pa sa maguwang ang maong pamahayag ug nipadayon kini sa pagkuha sa learning modules sa biktima.
Pila ka oras ang nakalabay mao na lang ang nahibaw-an sa ubang kabanay nga nagpakamatay.
Gipanubayan na sa otoridad ang maong panghitabo ingon man ang pagsuta kung aduna ba gyud kalabutan sa modules ang pagpakamatay niini, sanglit sa wa pa mahitabo ang insidente nitawag niadtong nakalabay’ng semana matod pa ang biktima sa maguwang niini nga ania sa dakbayan sa Sugbo nagtrabaho, ug nagbutyag nga gimingaw na kaayo kini sa iyang igsuon ug nangutana pa kung kanus-a maka-uli. /GBS
