CEBU CITY — Gikalipay ni Cebu City Mayor Edgardo Labella nga nagkaubos na ang ihap sa mga nagpositibo sa coronavirus disease o COVID-19 sa dakbayan karong niluag na ang quarantine restrictions.
Kini human nga niabot na og 197 ang active cases sa syudad ug walay natalang namatay sa coronavirus sulod na sa 10 ka adlaw.
Atol sa pagbisita ni Environement Secretary ug Task Force COVID-19 overseer nga si Roy Cimatu sa Sugbo, mibutyag ang mayor nga walay variance ug nagtakdo na ang mga datos sa Department of Health (DOH)-7 ug sa City Health Department.
Kini sukwahi na sa nakalabay nga panahon diin nakahukom si Cimatu nga tuohan ang COVID-19 cases sa DOH ug gipahunong ang City Health Department sa paghatag og update.
Gilauman karon sa Emergency Operations Center (EOC) nga mokunhod pa ang mga natalang kaso sa COVID-19 kung magpadayon ang trend niini sa mosunod nga panahon.
Una nang napaglantawan ni Cimatu nga epektibo ang gipatumang mga intervention sa dakbayan sa Sugbo karong nagkaubos na ang active cases.
Dugang pa sa mayor nga magpadayon ang pagpatuman sa health protocols sa dakbayan ug mitambag sa katawhan nga dili mokumpyansa nunot na sa nagkaluag nga quarantine restrictions.
