CEBU CITY — Gihimug-atan ni Cebu City Vice Mayor Michael ‘Mike’ Rama nga wala magkuwang ang konseho sa pagsuporta sa ehekutibo alang sa padayong pakigbatok sa hulga sa coronavirus.
Kini ang usa sa mga reaksiyon sa Bise Mayor sa nagsilbing pahimangni ni Emergency Operations Center Chief ug Cebu City Councilor Joel Garganera kabahin sa posibilidad nga subling ipa-ubos ang dakbayan sa lockdown kung mosaka’g balik ang kaso sa COVID-19.
Sigon ni Rama nga kinahanglang palambu-on pa gyud sa executive ang mga pama-agi sa pagkampanya batok sa makamatay’ng virus.
Kahinumduman nga nagpahimangno si Garganera sa posibilidad nga ‘lockdown’ human gikonsiderar niini nga ‘alarming’ ang nadugang nga bag-ong kaso sa COVID-19 sa dakbayan sa Sugbo niadtong nakalabay’ng adlaw human nga adunay 28 ka bag-ong kaso ang natala, taas ug katunga sa bag-ong ihap sa mga naka-rekober nga anaa sa 14 ka indibidwal.
Gani subling gipahimangnu-an sa konsehal ang publiko ilabi na sa mga trabahu-an nga pabiling motamod ug mosunod sa mga standard health protocols batok sa coronavirus. (GBS)
