CEBU CITY — Nipagawas ang Cebu City Legal Office ug show-cause orders sa mga barangay officials sa Brgy. Lahug kung diin nahimutang ang tindahan sa sapatos nga nag-sale ug gitapuk-an sa bagang duot sa katawhan nga nakalapas sa health protocols batok sa COVID-19.
Una niini nakigtambayayong na usab Cebu City Police Office (CCPO) sa mga buhatan sa Cebu City Legal Office ingon man sa Emergency Operations Center (EOC) alang sa paghan-ay sa atubangong silot sa tag-iya sa tindahan ug sapatos nga JS Footwear.
Matod ni Cebu City Police Office Intelligence Branch Chief PMaj Randy Caballes, sa habig sa kapulisan, mag-atubang ug kasong kalapasan sa pagtuman sa minimium health standards ang tag-iya sa tindahan ug uban pang posibleng kalapasan gumikan sa panghitabo.
Samtang nagpagawas na ug show cause order ang Cebu City Business Processing and Licensing (BPLO) ngadto sa JS Footwear diin gihatagan kini ug tulo ka adlaw aron makatubag sa ilang mga kalapasan.
Kini human masuta nga matod pa ang maong tindahan nakalapas sa Executive Order No. 094 nga gi-isyu ni Cebu City Mayor Edgar Labella gumikan sa pakyas nga pagpatuman sa social distancing ning panahon sa pandemya.
Nasayran usab nga gawas sa naasoy’ng kalapasan, wala usab matod pa’y promotion permit ang maong tindahan gikan sa Deoartment of Trade and Industry (DTI) ug wala usa’y business permit hinungdan nga gipasirad-an sa City Government ang maong tindahan human mi-operate bisan pa man og wala pa kini mahuman og proseso sa ilahang business permit. (gbs)
