CEBU CITY — Gihimug-atan ni Land Transportation Office (LTO-7) Director Victor Caindec nga suportado sa mismong ahensya ang lakang sa mga Local Government Units (LGUs) lakip na ang lokal nga pangagamhanan sa syudad sa Sugbo alang sa pagpabalik ug dagan sa mga traditional jeepneys.
Gipasabot ni Caindec nga ang papel sa LTO-7 niining kaugdahan sa dakbayan, mao ang pagsuta sa mga jeepney units nga na pre-process na, diin lakip sa sutaon ang kondisyon sa maong mga sakyanan.
Mismong ang buhatan sa LTO na ang nikab-ot sa mga venue kung asa gipahigayon sa LGU ang pag-proseso sa mga traditional jeepneys aron dili na molinya pa ang mga operators sa opisina sa LTO-7.
Gitataw ni Caindec nga angayang balansehon sa tanan ang mga angayang i-konsiderar ning panahon sa pandemya sanglit dili lang matod pa ang mismong epekto sa sakit nga COVID-19 ang makadaot sa mga tawo kundi lakip na dinhi ang epekto usab sa bati-ong kagutom gumikan sa padayong pagtago tungod sa kahadlok sa virus.
Hinu-on lakip sa gipunto sa opisyal mao ang dili pagkumpiyansa sa publiko ug kanunay gyud mohimo sa mga health protocols batok sa coronavirus.
Nasayran nga adunay pipila ka mga indibidwal nibutyag nga delikado ang pagpabalik sa mga traditional jeepneys karong panahuna sanglit gawas nga anaa pa ang hulga sa coronavirus, kini usab matod pa unya ang hinungdan nga mobali ug huot ang dagan sa trapiko sa dakbayan. (gbs)
