CEBU CITY – Gipasaka ang kasong murder sa mga suspek sa pagpatay sa high-profile lawyer nga si Atty. Joey Luis Wee. Gipresentar sa mga sakop sa media ang usa sa gitudlong responsable sa pagpusil-patay kang Atty. Wee nga una nang nasikop sa mga sakop sa National Bureau of Investigation (NBI) sa kauluhan.
Ni-abot gahapon sa Sugbo ang usa sa gitudlong gunmen nga si Fausto Edgar Benigno Peralta nga basi sa impormasyon sa NBI, kanhi kini sundawo ug kasamtangang nagtrabaho isip OIC sa usa ka Security Agency sa kauluhan.
Matod ni NBI-7 Director Atty. Renan Oliva gihuptan na nila ang uban pang mga ebedensiya lakip na ang mga pangalan sa ubang suspek nga naglangkob sa unom ka mga gunmen.
Sa datos sa NBI, giila ang laing duha pa ka mga suspetsado nga padayon pang gipangita sa otoridad nga mao silang John Raymund Suarez ug Randy Palparan. Nasayran nga ni-abang pa ug pension house ang mga suspek una gihimo ang pagpatay kang Atty. Wee. Samtang aduna usa’y mga ebedensiya ang otoridad gikan sa Mactan-Cebu International Airport kalabot sa pag-abot sa mga suspetsado human kini naglog-book sa airport.
Gituhu-an usab nga dinhi na sa Sugbo nag-asikaso sa ilang mga armas ang mga suspek alang sa pagpatay sa abogado.
Kahinumduman nga gipusil-patay si Atty. Wee niadtong Nobyembre 23 ning kasamtangang tuig sa building sa Brgy. Kasambagan dakbayan sa Sugbo kung asa nahimutang ang opisina sa abogado.
