CEBU – Dili angayan nga ipaubos sa State of Calamity ang Barangay Inayawan gumikan lang sa pagpasirado sa transfer station.
Gibutyag ni Atty. Floro Casas, Cebu City Administrator, nga ‘manageable’ ang mga basura sa syudad ug wala man kini nagkatag sa mga kadalanan.
Matud ni Casas nga gisiguro ni Cebu City Mayor Edgardo Labella nga wala’y angayan nga kabalak-an sa mga basura gumikan kay giingong ‘in-place’ ang sistema ug gani aduna na sila’y nakab-ot nga solusyon alang sa maong concern.
Gipahibalo usab niini nga gi-meeting na ang tanang barangay kapitan sa Cebu City-South District kansang hilabihan nga naapektohan sa pagsirado sa transfer station.
Sugyot ni Atty. Casas nga kung adunay mga makita nga nagtipun-og nga mga basura sa kadalanan, hayan manawag gilayon sa iyahang opisina arun nga mahatagan kini ug hinanali nga aksyon.
