CEBU – Tumang kainit sa panahon ang posibli nga hinungdan sa kamatayon sa 46 ka mga illegal migrants sa San Antonio City, Texas, USA kagahapong adlawa, oras sa Pilipinas.
Gibutyag ni Pinoy Legarda Gonzales, Bombo International News Correspondent sa Texas nga hilabihan ang kataas sa temperatura sa estado diin mukabat sa 40 degree celcius o 104 fahrenheit.
Matud pa, posibli nga wala ma-agwanta sa naasoy nga mga migrante ang kainiton sulod sa tractor-trailer kung diin walay igong ‘ventilation’, hayan gibana-banang anaa sa 50 degree celcius ang temperatura.
Sigon ni Gonzales nga dili lang kini ang pinaka-unang higayon nga nahitabo ang susama nga insidente gumikan kay bisan pa sa mga nakalabay nga katuigan, daghan nang mga illegal migrants ang namatay human nga misulay sa pagtabok sa border sa Mexico ug US.
Bisan pa man sa maong mga panghitabo, giingong daghan sa gihapon nga mga taga Central America ang buot nga mutabok sa border arun lang nga manarbaho, hayan halapad ang human smuggling sa Estados Unidos.
Gipahibalo usab niini nga lauman ang mas daghan pang mga illegal migrants nga gustong mutabok sa Estados Unidos, ilabi na karun nga usa ka Democrat si US President Joe Biden diin nag-awhag ug mas lu-ag nga ‘passage’ alang sa maong mga migrante.
