CEBU – Duha ka mga residente sa dakbayan sa Sugbo ang nadakpan tungod sa paghupot og 25 gramos sa gituohang shabu nga mobalor og P170,000 atol sa buy-bust operation sa Barangay Poblacion, dakbayan sa Talisay pasado alas 8 sa gabii. niadtong Sabado, Okt. 8.
Giila sa kapolisan ang mga suspetsado nga sila si Kynneth Diola, 27, ug Anthony Castro, 47. Ang duha pulos taga Barangay Basak San Nicolas sa dakbayan sa Sugbo.
Matod sa kapulisan, ang duha ka lalaki mokuha sa ilang supply gikan kang Raymund Camacho, kanhi police asset kinsa nasikop sab niadtong Sabado sa gabii.
Nasikop si Camacho usa ka oras human sa buy-bust operation sa Barangay Poblacion, dakbayan sa Talisay.
Matod sa kapulisan nga sila si Diola ug Castro napriso sa sayo pa tungod sa kasong drug-related.
Samtang si Diola nasikop niadtong Abril 2022 sa kapolisan sa dakbayan sa Mandaue apan nakagawas niadtong Hunyo human siya makapiyansa.
Una nang nasikop si Castro sa kapulisan sa Dumanjug niadtong 2006 apan gibuhian ra usab kini human nabasura ang iyang kaso.
Samtang sa pikas kabahin nasikop ang usa ka lalaki nga kanhi police asset nga nakuhaan og P748,000 nga kantidad sa gituohang shabu atol sa buy-bust operation sa Barangay Dumlog sa dakbayan sa Talisay.
Giila ang suspek nga si Raymund Camacho, 33-anyos.
Matod sa kapulisan, si Camacho nitukod og armadong grupo diin ang mga sakop niini mopresentar sa ilang kaugalingon isip law enforcers ug mohimo og mga operasyon batok sa mga drug personality.
Nasakmit gikan nila ang ilegal nga drugas, kuwarta ug ang service vehicle sa mga drug suspects.
