CEBU – Giawhag ni Dr. Daisy Villa, ang Cebu City Health Officer, ang mga ginikanan nga daling ipakonsulta sa mga barangay health center ilahang mga bata kung ugaling nakasinati kini hilanat.
Matud pa, dili na kinahanglan nga maabtan pa ug duha ngadto sa duha ka adlaw ang hilanat sa bata una kini ipa-checkup gumikan kay adunay kapabilidad ang mga barangay health centers sa syudad nga ma-check kung kini ba positibo sa sakit nga dengue.
Gani, gipahibalo niini nga adunay mga laboratory ang pipila ka mga barangay nga mususi sa mga bata o bisan pa sa mga dagko kung kini adunay dengue, sama na lang sa Barangay Talamban, Mabolo, Pari-an, Guadalupe, Punta Princesa, Cogon Pardo, ug Bario Luz.
Gibutyag ni Dr. Villa nga kung mahimo, ilahang atimanon ang pasyente sa ilahang ‘scope’ nga dili na ma-admit pa sa mga tambalanan.
Gawas pa niini, gipahibalo usab sa City Health officer nga aduna usab sila’y ‘community surveillance system’ nga mao ang magsusi sa mga komunidad kung aduna ba’y mga gipang-hilantan ug kini mga kaso ba sa dengue arun nga mas madali ang ‘treatment’.
Apan iyahang gitino nga anaa ang City Health alang sa ‘prevention’ sa maong sakit pinaagi sa ilahang mga programa, ingon man nga anaa usab ang Cebu City Medical Center (CCMC) alang usab sa treatment kung ugaling ma-admit ang usa ka pasyente gumikan sa dengue.
