CEBU – Andam ug han-ay na ang Security Plan sa mga kapolisan sa Consolacion Municipal Police Station alang sa kasaulogan sa Misa de Gallo nga magsugod na karong Disyembre 16.
Adunay tulo ka mga parokya sa lungsod ang pagatutukan sa kapolisan nga mao ang San Narciso Parish sa Poblacion Occidental, St. Joseph Husband of Mary Parish sa Barangay Tayud ug San Isidro Parish sa Barangay Garing.
Padayon usab nga monitoron sa kapolisan ang mga Barangay Chapels nga magpahigayon usab sa Misa De Gallo.
Matud ni P/Lt. Col. Danilo Colipano ang hepe sa Consolacion Municipal Police Station nga aduna na silay giandam nga mga pamaagi aron pagpatuman sa kahapsay ug kalinaw ug nakig alayon na sab sila sa lokal nga kagamhanan alang niini.
Gani, nakig-alayon usab ang kapolisan sa matag barangay aron pagpangyo og abag sa mga tanod ug mga force multipliers sa pagpatuman sa seguridad.
Magbutang usab ang hepe ug Police Assistance Desk sa matag simbahan.
Dugang ni Colipano nga molibot usab ang mga mobile patrollers uban sa bag-ong tactical motorcycle units nga maoy mosuhid sa interior nga bahin sa mga kabarangayan sa lungsod.
Nanawagan usab si Colipano sa publiko ilabi na sa mga manimbahay nga magmabinantayon gayud ug siguradohon nga sirado gayud ang ilang panimalay o ba kaha isalig sa mga silingan kung walay mahibilin sa ilang panimalay.
Samtang sa laing bahin, gipadayag usab ni Engr. Danny Capangpangan ang hepe sa Local Disaster Risk Reduction and Management Office nga adunay Rescue Team nga ilang ibutang atbang sa San Narciso Parish panahon sa Misa De Gallo.
Miingon si Capangpangan nga padayon usab nilang monitoron ang mga kabarangayan ug naka-standby daan ang ang mga personnel ug ang ambulance kung adunay emerhensiya.
