CEBU CITY-Gipahibalo ni Cebu City Councilor Jerry Guardo, ang chairman sa Committee on Infrastructure, nga magpahigayon ug “investigation in aid of legislation” ang konseho subay sa nahitabo nga sunog sa Grand Residences Cebu Tower 4 Brgy. Kasambagan, dakbayan sa Sugbo.
Matud pa, gikinahanglan nga magpahigayon ug imbestigasyon ang konseho arun nga ilaha usab masuta kung unsa ang angayan nga buhaton sa City government arun nga dili na masubli ang maong insidente.
Nasayran nga ang maong sunog ang pinaka-unang higayon nga nahitabo sa kasaysayan sa Sugbo, diin unang higayon usab nga gipasaka sa kabomberohan ang pinaka-taas nga alarma, ang Task Force Bravo.
Sigon ni Guardo nga makig-istorya pa usab kini sa structural engineer arun nga masuta kung luwas pa bang kapuy-an ang maong condominium.
Samtang, gidugang usab sa konsehal nga muduso kini ug resolusyon sa konseho diin mag-mando sa mga developer o mga magtukod ug edipisyo nga gikinahanglan nga ‘functional’ ang mga water sprinkler system arun nga daling mapugngan ang kayo nga mo dako ug mukatap.
Kini human nga nasayran sa opisyal nga wala nag-function ang water sprinkler system sa maong building gumikan kay nagpadayon pa man ang konstruksyon niini.
Nagkanayon si Guardo nga bisan pa man nga wala pa mahuman ang building, gikinahanglan nga functional ang mga water sprinkler system.
