CEBU CITY-Dako ang kalipay sa mga van-for-hire operators nga naka-operate na sila sa bag-ong terminal luyo sa Cebu South Bus Terminal sugod niadtong Mayo 4, 2023 human nga mapahawa sa naandan nga terminal sa Barangay Kamagayan, dakbayan sa Sugbo.
Kini human nga mitugot si Cebu Provincial Governor Gwendolyn Garcia nga gamiton ang luyo nga bahin sa CSBT arun nga dili mawagtangan ug panginabuhi-an ang gatusan ka mga V-Hire drivers, ingon man nga adunay dugang masakyan ang mga pasahero paingon sa habagatan nga bahin sa Sugbo.
Atol sa panagtigom, gipadangat sa mga V-Hire operators ang ilahang kabalaka nga dili na makabyahe tungod kay wala sila’y tarung nga terminal sa dihang gipapahawa sa kanhi terminal sa Barangay Kamagayan.
Samtang, gipadangat ni Garcia nga arun mahimong han-ay ang operasyon ipaubos usab sila sa susamang sistema sa mga bus nga mo gamit sa beep card system.
Gani, gimandoan sa gobernadora si Carmen Quijano, ang general manager sa CSBT, sa paghimo ug dinali-an nga orientation alang sa mga operators ug drivers sa mga V-Hire.
Hinuon, andam ang mga V-Hire operators ug drivers sa pagsagop sa beep card system ug mo agi sa mga orientation nga gikinahanglan.
