CEBU CITY-Andam nga mupatuman ang kapulisan sa balaud kung ugaling hingpit nang idili ang pagpamaligya ug paggamit niining gikalingawan karun nga lato-lato.
Gibutyag ni Police Colonel Ireneo Dalogdog, ang director sa Cebu City Police Office (CCPO), nga sa pagkakarun wala pa man sila’y nadawat nga direktiba gikan sa national headquarters o sa Police Regional Office (PRO 7) sa pagsakmit sa maong duwa-an.
Ingon man, giingong wala pa’y ordinansa nga gipasar ang lokal nga kagamhanan sa syudad nga nagdili sa lato-lato.
Matud pa, dili sila magmakuli sa pagsakmit sa maong mga duwa-an kung adunay ordinansa o direktiba gikan sa ilahang nasudnon nga buhatan.
Hinuon, gitino ni Dalogdog nga wala may na-monitor ang kapulisan sa dakbayan sa Sugbo nga adunay kasamok o kagubot gumikan sa pagduwa ug lato-lato, susama na lang sa nahitabo sa kaulohan.
Una nang mipagawas ug pamahayag ang Department of Trade and Industry (DTI) nga mahimong ikumpiskar sa gobyerno ang lato-lato gumikan kay wala kini tukma nga mga dokumento gikan sa Food and Drugs Administration (FDA) kung luwas ba kini nga gamiton ilabi na sa mga bata, ingon man sa mga hamtong.
