CEBU CIITY-Giila na sa kapolisan dinhi ang babaye nga napalgang patay ug gisulod sa kahon nga gibilin daplin sa dalan sa Barangay Tisa, dakbayan sa Sugbo.
Gikompirmar ni Police Major Angelito Valleser, hepe sa Punta Princesa Police Station, nga ang biktima usa ka 19-anyos nga babaye nga taga Davao nga si Rhea Mae Tocmo.
Nasayran nga, si Tocmo taga Panabo City sa Davao del Norte ug kasamtangan nga nagpuyo uban sa mga paryente sa Mandaue City human mi-anhi sa Sugbo niadtong Hunyo 11, 2023, alang sa oportunidad sa pagpanarbaho.
Matod sa mga imbestigador, positibong giila sa mga kabanay sa biktima nga nagpuyo dinhi sa Sugbo ang patayng lawas niini, nitumbok nga ilang giila ang maong shorts nga paboritong sul-ubon ni Tocmo.
Dugang pa sa mga kabanay nga ang sapot ni Tocmo maoy iyang gisul-ob sa kataposang higayon nga ilang nakita nga buhi.
Kung kahinumduman, nga napalgan si Tocmo nga giputos og puti nga habol ug gihigot ang iyang mga kamot sulod sa gilabay nga kahon sa may Katipunan Extension sa Barangay Tisa, dakbayan sa Sugbo niadtong Lunes, Hulyo 17.
Sa kasamtangan, si Major Valleser niingon nga aduna na silay lead sa krimen apan nagdumili sa paghatag og dugang detalye, lakip na ang posibleng ‘persons of interest,’ sa nagpadayong imbestigasyon.
Gisugdan na usab sa kapolisan ang pagtigom og mga kuha sa closed-circuit television (CCTV) sa mga dapit diin si Tocmo katapusang nakit-an nga buhi, apil na sa dakbayan sa Mandaue, diin siya nagpuyo uban sa mga kabanay.
Dugang pa, ila usab nga i-secure ang mga CCTV video gikan sa mga inn kay ang puti nga habol nga iyang giputos posibleng iya sa maong mga establisemento.
