LAPU-LAPU CITY, CEBU-Nadakpan sa Kapulisan sa Siyudad sa Lapulapu ang unom ka mga akusado sa lainlaing kaso nga apil sa listahan sa Most Wanted Persons.
Lakip sa nasikop ang duha ka mga akusado nga pulos nag-atubang sa duha ka counts sa pagpanglugos nga mao sila si Arnel Sumayang, 36 anyus nga molopyo sa Barangay Basak nga Top 3 Most Wanted ug si Lucresio Ruiz Jr., 22 anyus nga molopyo sa Barangay Marigondon nga top 4.
Ang Top 2 nga boluntaryong nitahan sa Kapulisan mao si Maria Carmel Alison, 53 anyus nga molopyo sa Barangay Pajo nga nag-atubang sa tag duha ka counts sa kasong sexual assaults ug Acts of Lasciviousness.
Tulo usab ang nadakpan nga pulos nag-atubang sa kaso nga may labot sa ilegal nga drugas nga sila si Ronilo Pulvera, Top 4, Ramon Tampus, Top 8 ug Gilbert Jumao-as, Top 9.
Si Lapulapu City Police Director, Coronel Elmer Lim miingon nga ilang gihingusgan ang pagdakop sa Most Wanted Persons arun maminusan ang listahan niadtong dunay warrant of arrest.
Ingon man, dugang ni Col. Lim nga arun mapugngan nga makahimo og susama o laing krimen ang mga akusado.
